„მხოლოდ ერთობლივი სწორი ნაბიჯების დროა“

0

საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრმა ეკატერინე ტიკარაძემ ჯანდაცვის მიმართულებით დაგეგმილი რეფორმის პრეზენტაცია – „მხოლოდ ერთობლივი სწორი ნაბიჯების დროა“ გამართა.

“საქართველოს მთავრობის უმთავრეს პრიორიტეტს წარმოადგენს  ადამიანზე ორიენტირებული  პოლიტიკის გატარება, რომლის ფუნდამენტია ჯანდაცვაზე საყოველთაო ხელმისაწვდომობა, ოჯახსა და ბავშვზე ორიენტირებული სოციალური დაცვის სისტემა, დასაქმება და შრომის უსაფრთხოება, იძულებით გადაადგილებული პირების საჭიროებებზე ზრუნვა.  რამდენადაც,  ადამიანის კეთილდღეობის ყველა კომპონენტს განაპირობებს მისი ჯანმრთელობა, ამიტომ მსურს, დღეს სწორედ ჯანდაცვის სისტემაში დაგეგმილ ცვლილებებზე ვისაუბრო”, -განაცხადა ეკატერინე ტიკარაძემ პრეზენტაციის დასაწყისში.

მინისტრმა ჯანდაცვის მიმართულებით დაგეგმილი რამდენიმე რეფორმა წარმოადგინა, მათ შორის, ერთ-ერთი რეფორმა ეხება დაფინანსების ახალ სისტემაზე გადასვლას. ევროპულ სტანდარტებზე დაყრდნობით ჩამოყალიბებული ახალი სისტემა  ყველა კლინიკისათვის საყოველთაო ჯანდაცვის პროგრამის ფარგლებში მიწოდებული სერვისების ტარიფების გათანაბრებას ითვალისწინებს. ეს არის ფასწარმოქმნის აპრობირებული სისტემა, რომელიც დაწესებულებებს აყენებს თანაბარ პირობებში, უზრუნველყოფს ბაზრის რეგულაციას და ხარისხის მართვას. აღნიშნული ინიციატივა გახდება ქვეყნის მასშტაბით ერთიანი სტანდარტისა და ხარისხის მოთხოვნის საფუძველი, რაც უპირველეს ყოვლისა ორიენტირებულია პაციენტის ინტერესზე.  სამედიცინო დაწესებულებები, რომლებიც სელექტიური გზით, იქნებიან ჩართული საყოველთაო ჯანდაცვის  პროგრამაში, იღებენ ვალდებულებას, ბენეფიციარებს სერვისები მიაწოდონ სახელმწიფოს მიერ დადგენილი  ერთიანი ტარიფით. რეფორმის საჭიროება არაერთი ფაქტორით იქნა განპირობებული. მათგან ერთ-ერთი უმთავრესი არის სახელმწიფოს უპრეცედენტო დანახარჯების მიუხედავად, პაციენტის ჯიბიდან მაღალი გადახდები. მართალია, ბოლო 7 წლის განმავლობაში აღნიშნული მაჩვენებელი 73-დან 55%-მდე შემცირდა, მაგრამ ეს არ არის დამაკმაყოფილებელი შედეგი, რადგან ჩვენს მოსახლეობას კვლავ ტვირთად აწევს სამედიცინო მომსახურებისა და მედიკამენტებისთვის გადასახდელი თანხები.

მინისტრმა  კიდევ ერთ მნიშვნელოვან რეფორმაზე ისაუბრა, რომელიც პირველადი ჯანდაცვის სისტემას ეხება.

მისი თქმით, ადამიანის ჯანმრთელობის გზა პირველად ჯანდაცვაზე გადის. აუცილებელია პრევენციული სერვისების გაძლიერება,  ოჯახისა და სოფლის ექიმების როლისა და დატვირთვის გაზრდა, ოჯახის ექიმთან ვიზიტის და გეგმიური სამედიცინო შემოწმების კულტურის განვითარება.

ეკატერინე ტიკარაძემ  ხაზი გაუსვა საქართველოში იმ თანამედროვე ტექნოლოგიების დანერგვის მნიშვნელობას, რომელიც ბოლო წლებში დასავლეთის ქვეყნებში განსაკუთრებული პოპულარობით სარგებლობს  და თითოეული ადამიანისთვის მნიშვნელოვნად შეცვლის საკუთარ ჯანმრთელობაზე ზრუნვის პროცესს.

ეს ეხება საქართველოს მედიცინისთვის სრულიად ახალ მიმართულებას  –  ტელემედიცინაზე დაყრდნობილი პირველადი ჯანდაცვის აღჭურვილობას,რომლის საშუალებით მარტივად, უმოკლეს დროში სამედიცინო კვლევის ჩატარება, პაციენტის ჯანმრთელობის შესახებ მონაცემების მიღება და შენახვა, დაავადებების ადრეულ ეტაპზე გამოვლენა არის შესაძლებელი. ეს საკითხი მნიშვნელოვანია არამხოლოდ პერსონალურად პაციენტისთვის, არამედ სახელმწიფოსთვისაც, რომელსაც ეძლევა მეტი შესაძლებლობა, მუდმივად განახლებადი მონაცემებისა და სტატისტიკის საფუძველზე განსაზღვროს ჯანდაცვის პოლიტიკა და სტრატეგია. ტელემედიცინის პირველად ჯანდაცვაში დანერგვა იძლევა  სასწრაფო დახმარების საჭიროების შემცირების შესაძლებლობას, რაც საერთაშორისო მონაცემების თანახმად 30%-ით ამცირებს ჰოსპიტალური შემთხვევების რაოდენობას და მათზე დანახარჯებს. ტელემედიცინის ერთ-ერთი უმნიშვნელოვანესი შესაძლებლობაა ხელოვნურ ინტელექტზე დაფუძნებული დისტანციური კომუნიკაცია. სპეციალური ვიდეო ზარის პროგრამის საშუალებით, ექიმ-სპეციალისტს შეუძლია ოჯახის ექიმთან ვიზიტზე მყოფი პაციენტის კონსულტირება და დიაგნოსტიკა.

ეკატერინე ტიკარაძემ საქართველოში ტელემედიცინის პირველი მოწყობილობა  ღონისძიების სტუმრებს დღეს ადგილზე დაათვალიერებინა.

მინისტრმა სამედიცინო განათლებაზეც გააკეთა აქცენტი – „ჩვენ უკვე გადავდგით მნიშვნელოვანი ნაბიჯი ყველა იმ დარგის მხარდასაჭერად, რომელშიც სამედიცინო კადრების დეფიციტია. სახელმწიფო სრულად აფინანსებს იმ რეზიდენტების სწავლის საფასურს, რომლებიც აღნიშნულ სფეროში გადაწყვეტენ მოღვაწეობას. გარდა ამისა, ჩვენ ხელს შევუწყობთ ეროვნულ დონეზე, საერთაშორისო სტანდარტის განათლების მიღებას, რაც უპირველეს ყოვლისა საუნივერსიტეტო კლინიკების გაძლიერებით დაიწყება. წახალისებული იქნება ყველა ის რეზიდენტი, რომელიც სწავლების პროცესში მაღალ შედეგებს დააფიქსირებს. მათთვის სახელმწიფო შექმნის საზღვარგარეთ დარგის წამყვან კლინიკებში კვალიფიკაციის ამაღლების შესაძლებლობას, რაც იქნება სახელმწიფოს მხრიდან ადამიანურ კაპიტალში უმნიშვნელოვანესი ინვესტიცია.“

რეფორმა შეეხება მედიკამენტების საკითხსაც, რადგან სწორედ ამ კომპონენტზე მოდის მოქალაქეების ჯიბიდან დანახარჯების დიდი ნაწილი. მინისტრის თქმით აუცილებელია არსებობდეს კონკრეტული სტრატეგია.

„უპირველეს ყოვლისა ჩვენ ვმუშაობთ ფასების დარეგულირებასა და მედიკამენტების ჭარბად დანიშვნის კონტროლზე.  ხარისხის კომპონენტში, აქცენტს გავაკეთებთ ქვეყანაში წამლის რეგისტრაციისა და ბაზარზე დაშვების საკითხზე, რომლის აუცილებელი საფუძველი გახდება GMP სერთიფიკატი. მედიკამენტების რეგისტრაციისთვის გაჩნდება დამატებითი მოთხოვნები,  რომელიც იქნება   ხარისხისა და  უსაფრთხოების გარანტი“, – განაცხადა ეკატერინე ტიკარაძემ.

მინისტრმა ასევე ყურადღება გაამახვილა იმ ინფრასტრუქტურულ პროექტებზე, რომელთა განხორციელებაც უკვე მიმდინარეობს. ეს ეხება 400-მდე ამბულატორიის მშენებლობა-რეაბილიტაციას.

მისი განცხადებით, პროექტის დასრულების შემდეგ, 2024 წლისთვის ქვეყანაში თანამედროვე ტექნოლოგიებით  სრულად აღჭურვილი 831 ამბულატორია იქნება.

ღონისძიებას საქართველოს პრემიერ-მინისტრი, მთავრობისა და პარლამენტის  წევრები, თბილისის მერი,  საერთაშორისო პარტნიორები, ასევე სამედიცინო და სადაზღვეო სფეროს წარმომადგენლები ესწრებოდნენ.


Share.

Leave A Reply